کلارو

خِدایا تِه نوم جا کِمّه آغاز

تِه وَر زار زَمه، کِمّه راز و نیاز

 

تا یاری هکنی این بی صدارِ

ونگِ وا کنّه شه جان خدارِ

 

دلِ درد رِ گِمه رُخته ی جا

کِلاروی فِدا، مِه دردِ دوا

 

مَردِمِ چش تِه گیسه ی جا مسّهِ

پیچا پیلِچ تِه می دسّه به دسّه

 

تِه دور وَر هَمه دَشتیِ خَسّه

خِنه بِساتِنه رَسّه به رَسّه

 

خِدا تِه جا اِمارِ شاد هَکِرده

تِه وَر چَن تا مِحَل آباد هَکِرده

 

تِه راسِ اویِ پِه دییا چِه خوارِ

دِلودبارِ مِحَل، خِش تِه کِنار

 

سَربورا با بورا و مِقریکِلا

گذر کِنّی میونِ لَمسوکِلا

 

تا بَیکِلا شونه بَیروبِن او

میونِ بِزروپِه کیله یِ بِزرو

 

دَشتی خّشروپه او گیِنه تِه جا

شونتاشِ دِشت، سبزِ رو گیِنه تِه جا

 

دَشتِ پِتروپِه سبز و کَرکِنار سبز

سفیدِ طور و کِنارِ پَمّه جار سَبز

 

سَنگِ روپه تِه جا نوم بَیتا نِشون

پاریکِلا هَسّه تِه اویِ مَدیون

 

کاردیکِلای دَشتی چِه خِشاله

صِفا دَشت کنارِ فکچاله

 

خَلِه محل تِجا خِشحال و خَندون

تِه او اَمِه ایمون و پیلهٔ نون

 

خوامه تِه گوش بَخونّم رسم مردِم

ته نِوازش بَوه هر درد رِ مَلْحِم

 

گمِه قدیمیِ درد و بِلاره

خسّه تنِ دور، غیرت بلاره

اَتی خوامه بَوم دشتیِ دردِ

وشونِ روزگار همیشه سردِ

 

اَتی از شِه مَحْلِه کِمّه روایت

قدیم شونیشت رِ کمّه حکایت

 

اتی کمّه درد دل با کلارو

اَتی تَعریف کِمّه وِنِه بِک و بو

 

گمِه قدیمِ مُحَرم نالش

عزاداری کردنه بینه ناخِش

 

صُحبت کِمّه شکارِ قدیمون رِ

تله بزوئن، ویشه ی میون رِ

 

اَتی سون امیری زمّه ناله

امیر پازواری مِه سِلاله

 

چن تا دار رِ گمِه مِه سرِ ویشه

هزارون دار، اونجه، دایْنِنِه ریشه

 

کِلی زَنّه پرنده، و اشارِ سر

نِوازش کِنّه بلبل بهارِ وَر

 

گمِه سوتِ صِفای مازرون رِ

کمّه وَصم، این بهشتِ بی نشون رِ

 

خدا دونّه مازنرون بهشته

آسمون جا بَیته بِنه بِهشته

 

هدف دایمه تا جِوُنون بَدونِن

تِموم فرِد مازرون بَدونن

 

کِلاروخواهونی جا کشِنِه رُوش

مَحْله مَحْله تَجِنِه کنِّه سِروش

 

خدا دونّههمه دل مسّا خندون

پیروی کردنه رسم قدیمون

 

گد، گدی کرده، کچیک خوردی کرده

شرم و حیا، وشون رِ بییه پرده

 

اِسه گدا کچیکی بُرده کنار

سئوال بیزی چه کنّی جان برار؟